تال النهار فاش كيمشيو عند العدول، كتنقز البنت كتقول للعدول دير مؤخر الصداق قدا و قدا فالعقد من مليون تال 7 دالمليون ،

الدري ماكيفهم والو، لان هاد البلان ماكانش فبالو و مناقشوش معاها ، إما حيت ماعارفش أو نساه..

ماكيعرف باش تبلى فديك اللحظة و هو موجد كلشي و عارض على الناس للعرس يعني صعيب ترجع لور تال الدقيقة 90 .

إما كيقبل و كيقول سير على الله ،هانية ياك ماغنخلصهاش دابا ولهلا يوصلنا ليه أو محال نوصلو لهادشي كاع حيت مفاهمين

وكولشي ايذوز سمن و عسل..

أو كيرفض رفضا قاطعا و كتبدا المفاوضات و كتقولك “حقا لا كنتي كتبغيني قبل.. حقا انا خايفة على راسي.. هادي عادة في عائلتنا

و بنت خالتي و لا بنت عمتي دارتها..”

رغم دالك الدري كيكون قاصح و كيقوليها إما بلاش و لا تهلاي فراسك ابنت الناس طوي.

المهم مؤخر الصداق هو واحد المبلغ لي كيتقيد في العقد كتخلصو فقط نهار كتوقف على الطلاق مع زوجتك ،

البنات كيديرو مبلغ كبير تعجيزي كيوصل تال 5 دالمليون للفوق.

نهار كيسخن عليك راسك و كتبغي طلق خصك توجد داك الملبغ عاد من حقك طلقها..

سينو اتبقا مرهون فداك الزواج خالدين فيه سلك معاها وصافي ، و المرأة ديما لاعبة عليك العشرة

و ماعندها مناش تخاف راك مشدود و كتقرر تصبر أزغبي حيت ماعندك منين تجيب الفلوس.

وكاينين شي وحدات ولاو كيديروها حرفة ودايرة طلاق فبالها من لول يعني كتكون باغا غا دوز ديك المرحلة

دزواج والعرس وشوفوني راني تزوجت ولكن مكتابش باش من بعد تلعب براحتها وتعيش ما يسمى عندهم بالحرية

ونتوما عارفين مزيان شنو هي الحرية عندهم وكيفاش كيطرجموها باش تجمع واحد العدد من المال

وتخليك نتا وسط كتلة من مشاكيل والمصاريف

طبعا لا كنتي غا رشقات ليك و نضتي طلق و هي بنت الناس مزيانة معاك راه سرك نيت ،

لكن المشكل هو لا وصلتو بجوج لواحد المرحلة لي الطلاق هو الحل ادن خلص مؤخر الصداق و نتا لي جات فيك..

شحال من واحد قبل و سنا فلحظة فرح عند العدول و قال هانية كنموت عليها و من بعد سنين ماتفاهموش

و لقا راسو غارق بهاد الهم ، تاتقول تهنيت و كتلقا راسك خصك تحط الملاين لطليقتك كاش عاد تطلقها.

بحال هاد البنات لي كتبغي دير فيها نزقة ومادية ومطورة وعايقة، لا كنتي راجل حبس الزمر كامل عند العدول

و قوليها ماتايقاش فيا و يسحابليك الفلوس هي لي غتشدني أطهلاي ابنت الناس..

وفي الاخير يبقى الطلاق أبغض الحلال لكن مزيان تفهم هاد البلانات راه هي ولات دابا مع هاد الجيل

كلشي بالفلوس مابقات لا محبة لا مودة ولا رحمة..

غير متقلقوش هدا راه واقع ( بعض) البنات وركزو على بعض عارفين هادشي وشكرا لكم